Mira Road Railway Station: रेल्वे प्लॅटफॉर्मवर घुसवली रिक्षा, दारूच्या नशेत रिक्षाचालकाचा प्रताप

चेतन इंगळे, मीरा रोड

Mira Road News: रस्त्यावर नाही तर थेट रेल्वे प्लॅटफॉर्मवर (Railway Platform) रिक्षा चालवल्याची घटना समोर आली आहे. मीरा रोड रेल्वे स्थानकावर ही घटना घडली आहे. दारुच्या नशेमध्ये रिक्षाचालकाने हा प्रताप केला आह. सुदैवाने या घटनेत कोणतीही दुर्घटना घडली नाही. रेल्वे पोलिसांनी रिक्षाचालकाला (Riksha Driver) ताब्यात घेतले आहे. पोलीस (Railway Police) या प्रकरणाचा तपास करत आहेत.

मिळालेल्या माहितीनुसार, ही घटना रविवारी रात्री १२ वाजताच्या सुमारास घडली आहे. दारूच्या नशेमध्ये रिक्षाचालकाने थेट मीरा रोड रेल्वे स्थानकावर रिक्षा घुसवली. या रिक्षा क्रमांक एम एच 04- जे एच -4363 आहे. रिक्षाचालकाने प्लॅटफॉर्म वरच्या जिन्यावर रिक्षा चालवत दुसऱ्या बाजूने रिक्षा उतरवण्याचा प्रयत्न केला होता. पण त्याचा प्रयत्न फसला.

मात्र रिक्षाचालक दारूच्या नशेत असल्याने त्याला रिक्षा प्लॅटफॉर्मवरुन खाली उतरवणे शक्य झाले नसल्याचे प्रत्यक्षदर्शींनी सांगितले आहे. अजून ही रिक्षा मीरारोड रेल्वे प्लॅटफॉर्म वरच उभी असल्याची दिसत आहे. जागरूक नागरिकांनी रिक्षा चालकाला पकडून रेल्वे पोलिसांच्या ताब्यात दिले आहे. रिक्षाचालक दारुच्या नशेमध्ये असल्यामुळे मोठी घटना घडली असती. असे असताना देखील रेल्वे पोलीस प्लॅटफॉर्मवर उपस्थित नसल्याचे अनेकांनी आश्चर्य व्यक्त केले आहे.