Chandrapur News: एका क्षणात होत्याचं नव्हतं झालं, अंगावर वीज कोसळून एकाचा मृत्यू, घटनेचा धक्कादायक व्हिडिओ आला समोर

Chandrapur News: चंद्रपूरमध्ये (Chandrapur) अंगावर वीज कोसळून एका व्यक्तीचा दुर्दैवी मृत्यू झाल्याची घटना समोर आली आहे. वीज (lightning) कोसळल्यामुळे कोळसा खाण कामगाराचा मृत्यू झाला आहे. चंद्रपूर जिल्ह्यातल्या वकोली खाण परिसरात ही घटना घडली. या घटनेचा धक्कादायक व्हिडिओ समोर आला आहे.

मिळालेल्या माहितीनुसार, चंद्रपूर जिल्ह्यात गेल्या चार दिवसांपासून वादळी वाऱ्यांसह पाऊस पडत आहे. याचदरम्यान अंगावर वीज कोसळून एका व्यक्तीचा मृत्यू झाल्याची घटना घडली. वेकोली खाण परिसरात एका कामगाराच्या अंगावर वीज कोसळली. क्षणातच होत्याचे नव्हते झाले. अंगावर वीज कोसळल्यामुळे या कामगाराचा जागीच मृत्यू झाला. या घटनेचा व्हिडिओ समोर आला आहे.

अंगावर वीज कोसळल्यामुळे खाणकाम कामगार बाबू धनकुमार महेंद्र सिंह यांचा जागीच मृत्यू झाला. बाबू सिंह मंगळवारी दुपारी कामावर जात होते. त्याचवेळी ओसी टु नागलोण खाण परिसरात त्यांच्या अंगावर वीज कोसळली. बाबू सिंह वेकोलीच्या माजरी क्षेत्रातील नागलोन खाण परिसरातील के.जी. सिंग कंपनीत कामाला होते. ते ओव्हर बर्डनची वाहतुक करण्याचे काम करायचे. बाबू सिंह हे मुळचे बिहारचे राहणारे होते. या घटनेनंतर त्यांच्या कुटुंबीयांना कळवण्यात आले आहे.

दरम्यान, गडचिरोलीमध्ये सोमवारी अंगावर वीज कोसळून एकाच कुटुंबातील चौघांचा मृत्यू झाल्याची घटना घडली होती. लग्न कार्यक्रम आटोपून गावाकडे परत जात असताना झाडाखाली थांबलेल्या पती-पत्नी आणि दोन मुलांवर वीज कोसळून त्यांचा जागीच मृत्यू झाला होता. गडचिरोली जिल्ह्यातील कुरखेडा-देसाईगंज मार्गावरील तुळशी फाटा येथे ही घटना घडली होती.