Samruddhi Mahamarg: शेतकऱ्याने ट्रॅक्टरने रोखला समृद्धी महामार्ग; महामार्गावरील पाणी शेतात गेल्‍याने कांद्याचे नुकसान

नवनीत तापडीया

छत्रपती संभाजीनगर : जोरदार पावसामुळे महामार्गावर साठलेले पाणी शेतामध्ये वाहून गेले. या पाण्यामुळे शेतकऱ्याचे (Farmer) पाचशे क्विंटलहून अधिक कांद्याचे नुकसान झाले. त्यामुळे संतप्त झालेल्या शेतकऱ्यांनी समृद्धी महामार्गावर (Samruddhi Highway) ट्रॅक्टर आडवा लावून आपला रोष व्यक्त केला. (Tajya Batmya)

समृद्धी महामार्गाचे काम लवकर करण्याच्या घाईत नाल्यांचे काम अर्धवट राहिले आहे. यामुळे शेतकऱ्यांना त्याचा फटका बसत आहे. वैजापूर तालुक्यातील जांबरगाव शिवारात ही घटना घडली. वैजापूर तालुक्यातील जांबरगाव टोल नाक्‍याजवळ असलेल्या गट नंबर ३१ मधील शेतकरी सुनील भोसले, जनार्दन भोसले, पोपट भोसले, दीपक भोसले व गट नंबर ५० मधील देविदास साठे, राजेंद्र साठे यांच्या शेतात हे पाणी शिरले होते. यामुळे शेतातील (Onion) कांद्याचे नुकसान झाले आहे.

पोलिसांनी मध्‍यस्‍थी करत दिले आश्‍वासन

शेतकऱ्यांनी ट्रॅक्‍टर आडवे लावून समृद्धी महामार्ग रोखला होता. यामुळे पोलिसांनी मध्यस्थी करून शेतकऱ्यांची समजूत काढली. तसेच समृद्धी महामार्गावर येणारे पाणी आता शेतात येणार नाही असे आश्वासन त्याला दिले. यानंतर शेतकऱ्यांनी ट्रॅक्‍टर बाजूला करत मार्ग मोकळा केला.