Delhi News: दिल्लीमध्ये 16 वर्षांच्या मुलीची चाकूने भोसकून निर्घृण हत्या (Delhi Girl Killed Case) केल्याची धक्कादायक घटना समोर आली आहे. रविवारी संध्याकाळी दिल्लीच्या शाहबाद डेअरी परिसरात ही घटना घडली. ही घटना सीसीटीव्हीत (CCTV) कैद झाली आहे. या घटनेमुळे एकच खळबळ उडाली आहे.
पोलिसांनी दिलेल्या माहितीनुसार, दिल्लीच्या शाहबाद डेअरी परिसरात ही घटना घडली. आरोपी साहिलने साक्षीला वाटेत अडवले आणि तिच्यावर चाकूने 40 वेळा वार केले. आरोपी ऐवढ्यावरच थांबला नाही त्यानंतर त्याने साक्षीच्या डोक्यावर दगड टाकून तिची निर्घृण हत्या केली. घटनेची माहिती मिळताच पोलिसांनी तात्काळ घटनास्थळी धाव घेतली. मुलीचा मृतदेह शवविच्छेदनासाठी रुग्णालयात पाठवण्यात आला आहे.
पोलिसांनी सांगितले की, 'साक्षी आणि आरोपी साहिल दोघेही रिलेशनशिपमध्ये होते. मात्र शनिवारी दोघांमध्ये काही कारणावरून भांडण झाले. याचाच राग मनात ठेवून आरोपीने हे कांड केलं. साक्षीवर किती वेळा वार केले हे शवविच्छेदनानंतर कळेल.' साक्षी दिल्लीच्या ई-36 जेजे कॉलनीमध्ये कुटुंबीयांसोबत राहत होती. तिच्या हत्येमुळे कुटुंबीयांना मोठा धक्का बसला आहे.
साक्षी रविवारी संध्याकाळी आपल्या मैत्रिणीच्या वाढदिवसाला जाण्यासाठी घराबाहेर पडली. त्यावेळी साहिलने तिला रस्त्यामध्ये अडवले. दोघांमध्ये सुरुवातीला बाचाबाची झाली. त्यानंतर साहिलने सोबत आणलेल्या चाकूने साक्षीवर सपासप वार केले. साक्षी जोरजोरात ओरडत होती तरी साहिल तिच्यावर वार करतच राहिला. रस्त्यावरुन जाणारे सर्वजण पाहत होते पण कोणीच त्याला अडवण्याचा प्रयत्न केला नाही. साहिल ऐवढ्यावर थांबला नाही तर त्याने साक्षीच्या डोक्यावर सहा वेळा दगडाने वार केले.
साक्षीवर हल्ला केल्यानंतर आरोपी साहिलने घटनास्थळावरुन पळ काढला. रक्ताच्या थारोळ्यामध्ये पडलेल्या साक्षीला जखमी अवस्थेत तात्काळ नजीकच्या रुग्णालयात दाखल करण्यात आले. पण उपचारादरम्यान तिचा मृत्यू झाला. ही धक्कादायक घटना सीसीटीव्हीत कैद झाली आहे. याप्रकरणी आरोपी साहिलविरोधात दिल्लीच्या शाहबाद डेअरी पोलीस ठाण्यात हत्येचा गुन्हा दाखल करण्यात आला आहे. पोलीस फरार साहिलचा शोध घेत आहेत. या प्रकरणाची दखल दिल्लीच्या महिला आयोगाने घेतली आहे. त्यांनी आरोपीला तात्काळ अटक करण्याची मागणी केली आहे.
Read Marathi news and watch Live TV. Breaking news from Maharashtra, India, Pune, Mumbai, Politics, Entertainment, Sports, Lifestyle at SaamTV. Get Live Marathi news on Mobile. Download the Saam Tv app for Android and IOS.
